PATROLINEWS86.COM – SIKKA, NTT.
Ikatan Warga Asal Maluku (IWASMA) Kabupaten Sikka kembali ramaikan pertemuan rutin bulanan yang biking katong samua rasa dekat di hati.
Kali ini di rumah Bapak Bobby Norman Tomahu di Kewapante (belakang Kantor Polsek Kewapante), Kecamatan Kewapante, Kabupaten Sikka, Provinsi Nusa Tenggara Timur (NTT) jadi saksi bisu katong pung kebersamaan.
Puluhan basudara IWASMA dari pelosok Sikka datang bakumpul, jadikan ini acara par katong baku dapa muka, baku kenal lebih dalam, deng eratkatkan tali persaudaraan di rantau orang.
Acara mulai deng doa, minta berkat dari Tuhan par katong pung perkumpulan.
Abis itu, katong bacarita dari hati ke hati soal suka duka yang katong alami di Sikka.
Suasana jadi makin rame deng adanya maeng-maeng tempo dulu deng hidangan Maluku yang biking katong mangaku sadap.
Awak Media, PATROLINEWS86.COM yang ada di lokasi bilang, acara ini memang biking katong rasa katong pung keluarga ada di dekat katong, IWASMA Paleng Terbaik.
Bapak Bobby Norman Tomahu, yang bukan cuma anggota IWASMA tapi juga tuan rumah yang murah hati, bilang dari hati yang paling dalam, “Beta sanang skali bisa buka pintu rumah par katong samua.
Semoga pertemuan bagini biking katong pung ikatan makin kuat, deng biking IWASMA makin jaya.”
Fransisca Mariny Tomahu, anggota IWASMA yang selalu semangat, tamba lai, “Arisan ini bukan cuma sekadar kumpul-kumpul.
Ini kesempatan par katong baku berbagi pengalaman, baku topang satu sama lain.
Beta rasa beruntung bisa jadi bagian dari keluarga IWASMA.”
Maria Dona Inez, bicara singkat tapi padat, “IWASMA ini beta pung rumah kedua di Sikka.
Di sini, beta rasa aman deng nyaman, sama ke beta ada di tengah-tengah keluarga kandung.”
Abis samua curhat deng ketawa bersama, katong lanjut deng foto bersama, makang malam deng menu Maluku yang bikin lidah manggoyang, deng joged sama-sama iko irama lagu Maluku yang bikin semangat membara.
Suasana malam itu dingin, tapi katong pung hati tetap hangat karena rasa persaudaraan yang kuat.
Katong baku janji par terus biking IWASMA jadi wadah yang bermanfaat par katong pung anggota, par lestarikan katong pung budaya Maluku di tanah rantau, deng par biking katong pung suara didengar di Sikka.
Par tutup katong pung acara malam ini, beta mau ingatkan satu hal: “Laeng Rasa Beta Rasa, Mutiara Hati Simpan di Dada.
Katong Jaga Katong Pung Basudara, Par Hidop Damai di Rantau Orang.”
Semoga semangat persaudaraan ini terus menyala di hati katong samua, biar di mana pun katong berada.
Mari katong biking IWASMA jadi contoh par samua orang, bahwa persatuan itu biking kuat, deng kebersamaan itu biking indah.
